சல்மான் வழக்கிற்கும் இதற்கும் தொடர்பில்லை

சமன் செய்து சீர் தூக்கும் அப்படின்னு வள்ளுவர் ஏதோ எழுதி வச்சுட்டு போயிட்டார். நம்ம நாட்டு சட்டத்தை வடிவமைச்சவங்களும் அதையே பின்பற்றி செஞ்சுட்டு போய்ட்டாங்க.ஆனால் இவ்வளவு பெரிய ஜனநாயக நாட்டில அதெல்லாம் சரிபடுமா? அதனால நம்ம  குற்றவியல் சட்டத்தில உடனடியா சில மாற்றங்களை கொண்டு வரணும் முதல்ல ஜனங்களை நாலா பிரிக்கணும்.அய்யயோ வர்ணாஸ்ரம் இல்லிங்க இது வேற மாதிரி. 

முதல்ல A க்ருப். இதில அரசியல் வாதிங்க பெரிய ஆஃபிசருங்க இவங்கள்ளாம் அடங்குவாங்க.இவங்கள்ளாம் என்ன தப்பு செஞ்சாலும் ஒரு FIR கூட போடக் கூடாது. அவங்க தப்புக்கு தகுந்த மாதிரி பத்ம பூஷன் பாரத் ரத்னா போன்ற விருதுகளுக்கு இணையா ஏதேனும் விருது கொடுத்து கௌரவிக்கணும்.

ரெண்டாவது B க்ருப்.இதில பிரபலமான நடிகர்கள் விளையாட்டு வீரர்கள் இவர்கள் எல்லாம் அடங்குவாங்க. இவங்க தப்பு செஞ்சா FIR  போடலாம்.ஆனால் சாட்சி சொல்ல யாரும் வரக் கூடாது. இவங்க தண்ணி அடிச்சுட்டு வண்டி ஓட்டுனா மதுவோட தீமையை விளக்கத்தான் அப்படி செஞ்சாங்கன்னு அரசாங்கமே மக்களுக்கு எடுத்து சொல்லனும். ட்ராபிக்ல யாரையாவது அடிச்சு கொன்னுட்டாக் கூட, சட்டம் ஒழுங்கை காப்பாத்தத்தான் அப்படி செஞ்சாங்கன்னு அவங்களுக்கு பாராட்டு விழா நடத்தி பரிசும் கொடுக்கலாம். இதையெல்லாம் மீறி அவங்களுக்கு தண்டனை கொடுத்துத்தான் ஆகனும்னு ஒரு நிலை வந்துட்டா அந்த தண்டணையை அவங்க சார்பா வேற யாராவது அனுபவிக்கிற மாதிரி சட்டத்தில் மாற்றம் கொண்டு வரணும். அவங்க நடிச்ச படம் வரலைன்னா மக்களுக்கு ஏற்படும் நஷ்டத்தை எண்ணி உடனே இந்த சட்ட மாற்றத்தை கொண்டு வரணும். முடிஞ்சா இவங்க மேல  FIR  போட்ட அந்த ஆபிசருக்கு ஆயுள் தண்டனை வழங்கலாம்.

மூணாவது C க்ருப். இதில் எம் எல் ஏ க்கள் கவுன்கிலர்கள் இரண்டாம் நிலை அதிகாரிகள் இவர்கள் அடங்குவார்கள். இவர்கள் மீது FIR  போடலாம்.கைதும் செய்யலாம். ஆனால் விசாரணையை சீக்கிரம் முடிக்கக் கூடாது. மக்கள் பரபரப்பா வேறு விஷயத்தில் ஆழ்ந்திருக்கும்போது இவங்களை ரீலீஸ் பண்ணிடலாம்.இவங்க பெரும்பாலும் தங்கள் மேல் மட்டதின் மீதான விசுவாசத்தை காண்பிக்கத்தான் குற்றங்களில் ஈடுபடுவதால், இவர்கள் விடுதலை ஆனவுடன், எம் எல் ஏவாக இருந்தால் மந்திரியாகவும் கவுன்ஸிலராக இருந்தா எம் எல் ஏ வாகவும் ப்ரமோஷன் கொடுக்கலாம்.

நான்காவது D க்ருப்.இதில் கடை நிலை ஊழியர்கள் நம்மை போன்று அப்பாவி மக்கள் அடங்குவார்கள். இவர்களை அறிவிக்கப்பட்ட குற்றவாளிகள்  எனப் பிரகடனம் செய்யலாம்.ஐம்பது ரூபா லஞ்சம் வாங்குற கீழ் மட்ட அலுவலர்களை சும்மா விடக் கூடாது. அவங்களுக்கு கடுமையான தண்டணை கொடுக்கணும். அவங்க போட்டோவை பேப்பர் டிவியில் எல்லாம் போட்டு அசிங்கபடுத்தணும். அவங்க குடும்பத்தை எவ்வளவு அசிங்க படுத்த முடிமோ அந்த அளவு அசிங்கப்படுத்தனும். தண்ணி வரலைன்னு யாராவது போராட்டம் பண்ணினா அவங்களுக்கு  ஆயுள் தண்டனை கொடுக்கணும். இந்த மக்கள் அது வேணும் இது வேணும்னு ஏதாவது போராட்டம் பண்ணாமல் இருக்க ஒவ்வொரு வாக்களாருக்கும் ஒவ்வொரு வேட்பாளரும் ரூபாய் ஐநூறும் அரசாங்க சார்பா மானியமா ரூபாய் ஐநூறும்  ஒவ்வொரு தேர்தலின் போதும் கொடுக்கனும்னு சட்டத்தில் உடனடியா மாற்றம் கொண்டு வரணும். 

இந்த மாற்றங்களை உடனடியா கொண்டு வந்தா, நம்முடைய ஜனநாயகம் மேலும் வலுபெறும் என்பது நிச்சயம்.

நீதிமன்ற தீர்ப்புகளும் பாமரனின் சந்தேகமும்

தமிழக முதல்வர் அம்மாவின் மீதான சொத்து குவிப்பு வழக்கு கர்நாடக சிறப்பு நீதி மன்றத்தில் நடைபெற்று அதன் மேல் முறையீடு தற்பொழுது உயர் நீதி மன்றத்தில் ந்டை பெற்று வருவது அனைவரும் அறிந்ததே. வழக்கு குறித்தோ வழங்கப்பட்ட தீர்ப்பு குறித்தோ நிறைய விவாதங்கள் நடை பெற்று வருகின்றன. நம்முடைய நோக்கம் அவற்றை பற்றி விவாதிப்பது அல்ல. இவ்வழக்கு தொடர்பாக நீதி மன்றத்தின் சில உத்தரவுகள் நம்மை ஆச்சரியபடுத்துகின்றன.மேல் முறையீட்டின்போது கர்நாடக அரசு ஏன் வழக்கறிஞரை நியமிக்கவில்லை என்று உயர் நீதிமன்றம் ஏன் கேள்வி எழுப்பவில்லை? வழக்கின்போது திரு பவானி சிங் ஆஜராகக் கூடாது என திமுக சார்பில் மனு தாக்கல் செய்யப்பட்டபோது அதனை நிராகரித்த உயர் நீதிமன்றம் உச்ச நீதீ மன்றத்தில் வழக்குத் தொடர அறிவுறுத்தியது.திமுக சார்பில் உச்ச நீதீ மன்றத்தில் வழக்கு தாக்கல் செய்யபட்ட போது மேல் முறையீட்டு வழக்கு விசாரணையை நிறுத்தி வைக்க ஏன் உச்ச நீதிமன்றம் உத்தரவிடவில்லை.? வழக்கின் விசாரணை முடிந்து தீர்ப்பு வெளியாக வேண்டிய தருணத்தில் திரு பவானி சிங்கை தமிழக அரசு நியமித்தது தவறென்றும் எனவே புதியதாக ஒரு வழக்கறிஞரை கர்நாடக அரசு நியமிக்க வேண்டுமெனவும்,ஆனால் அதற்காக மறு விசாரணை நடத்த தேவையில்லை எனவும் திரு பவானி சிங்கின் வாதங்களை புறக்கணித்து விட்டு புதிய வழக்கறிஞர் எழுத்து மூலமாக கொடுக்கவுள்ள ஆதரங்களை பரிசீலனை செய்து தீர்ப்பு வழங்கவும் என ஒரு வித்தியாசமான தீர்ப்பை வழங்கியுள்ளது. திரு பவானி சிங் வாதிட்ட அந்த நாட்கள் எல்லாம் தேவையின்றி உயர் நீதி மன்றத்தின் பொன்னான நேரத்தை வீணடித்தது போல் ஆகவில்லையா? திமுக மனு தாக்கல் செய்தவுடனேயே வழக்கு விசாரணையை நிறுத்த உத்தரவு பீறப்பித்துவிட்டு, பவானி சிங் நியமனம் தொடர்பான வழக்கு முடிவடைந்தவுடன் விசாரணையை மேற்கொண்டிருக்கலாமே என்பதுதான் எங்களை போன்று சட்டம் படிக்காத பாமரர்களின் கேள்வியாக இருக்கிறது

கல்வீயில் மாற்றம் வேண்டும்

பொதுவாக எங்க காலத்துல அப்படின்னு யாராவது பேச்சை ஆரம்பிச்சாங்கன்னா ரொம்ப பேருக்கு பிடிக்காது. எனக்குக் கூடத்தான். ஆனால் நானே இப்பொழுது அப்படி ஒன்றை சொல்ல வேண்டிய நிலையில் இருக்கிறேன். ப்ள்ஸ் டூ ரிசல்ட் மே மாதம் எதோ ஒரு தேதியை குறிப்பிட்டு அன்று வெளியாகுமென  அதை ஒரு முக்கியமான செய்தியாக அனைத்து தொலை காட்சிகளும் ஒளிபரப்பிக் கொண்டிருந்தன. உண்மைதான்.இன்றைய கால கட்டத்தில் இது ஒரு முக்கியமான நிகழ்வுதான். ஆனால் எங்களுடைய காலத்தில் இருந்த ஒரு அறை குறையான சமூக பொறுப்பு கூட இன்றைய கல்வி முறையில் இல்லையோ என ஒரு ஐயம் எனக்குள் வருகிறது.நாங்களும் மாணவர்களை வெறும் மனப்பாடக் கருவிகளாக்கும் இதே  மெக்காலே கல்வி முறையில் பயின்றவர்கள்தான் என்றாலும், முப்பதாண்டுகளுக்கு முன்பு பள்ளிகளில் ஒழுக்கத்தையும் நீதியையும் விளையாட்டுகளையும் கற்பிக்க முயற்சிகள் மேற் கொள்ளப்பட்டது. ஆனால் இப்பொழுது ப்ளஸ் டூ வில் மார்க் எடுப்பது ஒன்று மட்டுமே முன் நிறுத்தப்பட்டு அதற்கான தயாரிப்புகளுக்கே முன்னுரிமை கொடுக்கப்படுகிறது. பல பள்ளிகளில் விளையாட்டு மைதானங்களே கிடையாது. நீதி போதனை வகுப்புகள் கிடையாது.குடிமை பயிற்சிக்கான தனி வகுப்புகள் இல்லை. ஒரு சிலப் பள்ளிகளில் இவற்றிற்கெல்லாம் நேரம் ஒதுக்கப்பட்டிருந்தாலும் அந்த நேரங்களில் வேறு பாடங்களே நடத்தப்படுகின்றன. இன்னும் சொல்லப்போனால் ப்ள்ஸ் 1 வகுப்பகளில் கூட ப்ளஸ் டூவிற்கான பாடங்களே பெரும்பான்மையானப் பள்ளிகளில் நடத்தப்பட்டு வருகின்றன. மொழிப் பாடங்களுக்கான முக்கியத்துவம் முற்றிலுமாக குறைந்து விட்டது. இதற்கெல்லாம் பள்ளிகளை குறை சொல்வதற்கு ஒன்றுமில்லை..ப்ளஸ் டூ முடித்தவுடன் பொறியல் கல்லூரிகளிலோ அல்லது மருத்துவ கல்லூரிகளிலோ சேர்வதற்கு மொழிப் பாட மதிப்பெண்கள் எடுத்துக் கொள்ளப்படுவதில்லை என்பதே முக்கிய காரணம்.,இதனால் மாணவர்களுக்கு மொழி மற்றும் இலக்கியம் மீதான ஆர்வம் மிகவும் குறைந்து வருகிறது. இந்த நிலையினை மாற்றம் செய்ய அரசு கல்வி முறையில் சில மாற்றங்களை கொண்டு வர வேண்டும்.மெக்காலே முறையை உடனடியாக உடனே அகற்ற முடியாதெனினும் கொஞ்சம் கொஞ்சமாக சில மாற்றங்களை கொண்டு வர அரசு முன் வர வேண்டும்.

ப்ளஸ் 1 முடிவில் மொழிப் பாடங்களுக்காண பொது தேர்வு அறிமுகப் படுத்தப்பட வேண்டும்.அதில் பெறும் மதிப்பெண்களில் ஏதேனும் ஒரு சத விகிதத்தை  தொழிற்கல்வி தகுதிக்கான மதிப்பெண்களுடன் இணைக்கப் பட வேண்டும்..

விளையாட்டுகளுக்காக மதிப்பெண் வழங்கப்பட்டு அவற்றையும் தகுதிக்கான மதிப்பெண்களோடு சேர்க்க வேண்டும்.

குடிமை பயிற்சி மற்றும் நீதி வகுப்புகள் ஆறாம் வகுப்புகளில் இருந்து கல்லூரிகள் வரை நடத்தப்படவேண்டும். குடிமை பயிற்சி வகுப்புகளில் ஒரு நல்ல குடி மகனாக எப்படி வாழ வேண்டும் என்பது போதிக்கப் பட வேண்டும்.வன்முறை போராட்டங்களில் பொது சொத்துக்கள் எப்படி நாசப் படுத்தப் படுகின்றன அதனால் மக்கள் வரிப் பணம் எப்படி வீணடிக்கப்படுகிறது என்பதை வீடியோக்கள் மூலம் மாணவ்ரகளுக்கு விளக்க வேண்டும். சாதி மத கலவரங்களால் மனிதம் எப்படி பாதிக்கப் படுகிறது .மதுவினால் ஏற்படும் பாதிப்புகள், லஞ்ச ஊழல் லாவண்யங்களால் ஏற்படும் விபரீதங்கள் ஆகியவையும் மாணவ்ர்களுக்கு எடுத்து சொல்லப்பட வேண்டும். மேலை நாடுகளில் போக்குவரத்து விதிகள் எவ்வாறு தவறாமல் கடை பிடிக்கப் படுகிறது, மக்கள் எங்கு சென்றாலும் ஒருவரையொருவர் தள்ளிக் கொள்ளாமல் வரிசையில் நின்று எப்படி பயன் பெறுகிறார்கள் போன்றவற்றையும் போதிக்கப்பட வேண்டும். ஏழை எளியவர்களுக்கு உதவுதல் பெண்களிடம் ஒழுக்கமாக நடந்து கொள்ளுதல்,ஊனமுற்றவர்கள் முதியவர்களிடம் எவ்வாறு பண்புடன் நடந்து கொள்ளுதல் இதை போன்று இன்னும் பலவற்றையும் நீதி போதனை வகுப்புகளில் சொல்லி கொடுக்கலாம். மாணவர்களின் ஒரு சத விகிதத்தினராவது இவற்றை உள் வாங்கினால் அடுத்தத் தலை முறையிலாவது நமது தமிழகம் இந்தியாவின் முன் மாதிரி மாநிலமாகத் திகழும் வாய்ப்பினை பெறும்.

பிச்சைகாரர்... சிறுகதை

அன்று திங்கட் கிழமை
கலெக்டரிடம் மனு கொடுக்க நீண்ட வரிசை நின்றிருந்தது.
ஒரு கிழவர் தடுமாறியபடியே நின்று கொண்டிருந்தார்.

கலெக்டர் அவரை அருகில் அழைத்தார்.

"பெரியவரே உங்களுக்கு என்ன வேண்டும்"

"அய்யா எனக்கு ஒரு சர்ட்பிகேட் வேணும். ரெண்டு வருஷமா அலையிறேன். இன்னும் கெடைக்கலை"

"என்ன சர்டிபிகேட்  பெரியவரே"

"அய்யா எங்க ஊரில் ஒரு தர்ம ஸ்தாபனம் இருக்கு.அவுங்க பிச்சை எடுத்து ஜீவனம் செய்றவங்களுக்கு உதவி செய்ராங்க. எனக்கு பிச்சை எடுத்துதான் ஜீவனம் செய்றேன்னு ஒரு சர்டிபிகேட் வேணும் அவ்வளவுதான்"

உடனே கலெக்டர் சம்பந்தப்பட்ட அதிகாரிகளை ஏவ, எல்லோரும் பர பரவென அந்த கிழவரிடம் ஓடி வந்து, ஏதோ விசாரணை செய்து விட்டு, அரை மணி நேரத்தில் சர்டிபிகேட்டோட ஓடி வந்து கலெக்டரிடம் கொடுத்தார்கள்.

கலெக்டர் உடனே அந்த கிழவரை அழைத்தார்.

"இதோ உங்கள் சர்டிபிகேட் வாங்கிக் கொள்ளுங்கள்"

கிழவர் சொன்னார்

"அய்யா மன்னிக்கணும் இந்த சர்டிபிகேட்ல என் பெயருக்கு பதிலா அதோ அந்த வெள்ள பேண்ட் போட்டுட்டு இருக்காரே அந்த ஆபிசர் அவர் பேரை போட்டு கொடுத்துடுங்க. அவர்தான் என்னை விட அதிக கஷ்டத்தில இருக்கார், எங்கிட்டய இருபத்தஞ்சு ரூபா கொடுத்தா தான் சர்டிபிகேட் கொடுப்பேன்னு ரெண்டு வருஷமா சொல்லிகிட்டிருந்தார் பாவம்"

சொல்லிக் கொண்டே கிழவர் அங்கிருந்து நகர, கலெக்டர் முதல் அத்தனை ஆபிசர்களும் அதிர்ச்சியில் உறைந்து போனார்கள்.

கிரிக்கெட் தோல்வியும் சில கிறுக்குத்தனங்களும்

உலக கோப்பை கிரிக்கெட் போட்டித் தொடங்குவதற்கு முன் நடந்த இரண்டு பயிற்சி ஆட்டங்களில் இந்தியா மோசமாகத் தோற்றது. அதனால் இம்முறை உலக கோப்பைப் போட்டியில் இந்தியா மிகவும் கடுமையானத் தோல்வியை சந்திக்கும் என்றே பலரும் நினைத்தனர்.ஆனால் லீக் ஆட்டங்களில் நமது வீரர்கள் தங்கள் அற்புதமான ஆட்டத்தை வெளிப் படுத்தி ஆறு ஆட்டங்களில் தொடர்ந்து வெற்றி பெற்றதுடன் கால் இறுதியில் பங்ளாதேஷையும் வீழ்த்தி சாதனை புரிந்தனர். அடுத்தது அரை இறுதி ஆஸ்திரேலியாவுடன் என்றதுமே வெற்றி வாய்ப்பு 50/50 தான் என்பது அனைவருக்கும் தெரிந்தே இருந்தது. அதிலும் பலம் வாய்ந்த ஆஸ்திரேலிய அணி டாஸையும் வெல்ல வெற்றி அதன் பக்கம் சாய்ந்தது. இந்தியா தோல்வியைத் தழுவியது. அவ்வளவுதான்.. 

சிலர் இதற்காகவே காந்திருந்தது போல் கிரிக்கெட்டை பற்றியும் கேப்டன் தோனியைப் பற்றியும் நமது வீரர்களை பற்றியும் கடுமையான விமர்சனங்களை முன்வைக்க ஆரம்பித்து விட்டனர், 

சிலர் ஒரு படி மேலே போய் வீராட் கோலியின் பர்சனல் விஷயங்களில் எல்லாம் தலையிட்டு ஏதோ அவர் காதலியினால்தான் அவர் சரியாக விளயாடாதது போல் விமர்சிக்கிறார்கள்.எவ்வளவு பெரிய வீரராக இருந்தாலும் சில நேரங்களில் தடுமாறுவது ஒன்றும் அதிசயமில்லை.அதற்காக இப்படியெல்லாம் கேவலப்படுத்துவது நாகரிமானவர்கள் செய்யக்கூடியது அல்ல. 

ஒரு திரைப் பட இயக்குனர் நமது மக்களை சோம்பேறியாக்கும் கிரிகெட் ஒழிய வேண்டும் அதனால் இப்படிப் பட்ட தோல்விகள் அடிக்கடி நடக்க வேண்டும் என்று சாபமிடுகிறார். நமது திரைப் படங்களை விடவா கிரிக்கெட் இந்த நாட்டை சீரழிக்கிறது? நமது மக்கட்த் தொகையில் ஒரு சத வீதமோ இரண்டு சதவீத மக்களோதான் கிரிகெட் ரசிகர்களாக  இருக்கிறார்கள்.ஆனால் திரைப்படம் பார்க்கும் மக்கள் எத்தனை சத வீதம்? 

விளையாட்டில் வெற்றித் தோல்வி என்பது தவிர்க்க முடியாத ஒன்றுதான். அதைப் போலவே ஒரு நாட்டில் சில விளையாட்டுகளில் மக்கள் ஆர்வம் காட்டுவதும் இயல்பானதே. ஐரோப்பிய நாடுகளில் கால்பந்து எவ்வளவு தீவிரமாக ரசிக்கப்படுகிறது என்பதை அனைவரும் அறிவர்.அதைப்போலவே அமெரிக்கா போன்ற நாடுகளில் கூடைப்பந்தும் வேறு சில நாடுகளில் டென்னிஸ் போன்ற விளையாட்டுகளும் மக்களால் பெரிதும் விரும்பப்படுகிறது. அங்கெல்லாம் யாரும் ஐயோ இங்கு வேறு விளயாட்டே இல்லையே என்று வருத்தப்படுவதோ விமர்சிப்பதோ இல்லை.நாம் மட்டும் ஏன் இப்படி இருக்கிறோம்? 

Times Now என்ற ஊடகத்தில் நமது கிரிக்கெட் வீரர்கள் பற்றி மோசமாக விமர்சிக்கப்படுவதுடன் அரை இறுதி தோல்விக்கு தோனியின் தலைமைதான் காரணமென்று மன சாட்சி இல்லாத விமர்சனம் முன் வைக்கப்படுகிறது. பலரால் விரும்பப்படும் ஒன்றைப் பற்றி கடுமையாக விமர்சனம் செய்தால் அதனால் எழும் விவாதங்கள் மூலம் புகழ் பெறலாம் என்பது நமது நாட்டில் தற்பொழுது ஒரு நடை முறை ஆகிவிட்டது. இந்த கிறுக்குத் தனங்களுக்கு முடிவு எப்பொழுது வரும்?

புத்தனை பூஜிக்காதீர்கள்

சிந்தனையை இழந்த சிங்களர்களே

வெற்றிப் பெற்றுவிட்டோம் என இறுமாந்திருக்கும் நீங்கள் , சொந்த நாட்டவர்களை கொல்வதற்காக அன்னிய நாடுகளின் கைகூலிகளாய் மாறிப்போன உங்கள் அரசியல்வாதிகளைப் பற்றி அவமானப்படவில்லையா?

விளைவுகளுக்கெல்லாம் விடுதலைப் புலிகள்தான் காரணமென்னும் விளக்கம் சொல்லும் நீங்கள், அமைதியாய் இருந்த ஒரு இனம் ஆயுதம் தூக்கியது ஏன் என அரை கணம் கூட சிந்திக்க மாட்டீர்களா?

இனத்தை அழிக்க நினைக்கும் நீங்கள், இனத்துரோகிகளுக்கு இடமளிப்பதை இழிவென்று எண்ணவில்லையா?

எண்ணற்ற இனங்கள், எண்னற்ற மொழிகள் , எத்தனையோ வேறுபாடுகள் அத்தனையையும் ஒருங்கிணைத்து எத்தனை நாடுகள் ஏற்றம் பெறுகின்றன- இரண்டே இனம், இரண்டே மொழி , ஒருங்கிணைக்க முடியாத உங்கள் மிருக குணத்தால் , இழிவு பட்டுகொண்டீருக்கிறீர்கள் என்பதை உணர மாட்டீர்களா?

எழில் மிகு இலங்கையாக அறியப்பட்ட நீங்கள் இப்பொழுது அரசு பயங்கரவாதத்தின் அடையாளமாய் மாறிப்போய்விட்டீர்களே- இது உங்களுக்கு அசிங்கமாக இல்லையா?

சொந்த நாட்டில் உரிமைகளை கோரியவர்களை கொன்று குவித்துவிட்டு கும்மாளமிடுவது உங்களுக்கு குற்ற உணர்ச்சியை ஏற்படுத்தவில்லையா?

சிறார்களையும், மகளிரையும் கூட சிதைத்த மனிதாபிமானமற்ற உங்கள் ராணுவத்தை பாராட்டி மகிழ்வதுதான் உங்கள் பண்பா?

நீங்கள் அறுத்தப் போட்டதெல்லாம் எம் இனத்தின் வேர்கள் அல்ல. அவை விளவித்த கனிகள். வேர்கள் மீண்டும் முகிழ்க்கும்போது இன்று போல் அன்று நீங்கள் வேடிக்கை பார்க்க முடியாது.

அகிம்சை சொன்ன புத்தனை ஆலயங்களில் வைத்துவிட்டு, ஆட்களை கொல்லும் அரங்கமாக இலங்கையை மாற்றிவிட்ட நீங்கள் இனியாவது புத்தனை பூஜிக்காதீர்கள் அது புத்தனுக்கு இழுக்கு!

தோனி- தன்னிகரற்ற தலைவன்!

இந்திய கிரிக்கெட்டை நீண்ட நாட்களாக கவனித்து வருபவர்களில் நானும் ஒருவன். நவாப் பட்டோடி காலம் முதற்கொண்டு இன்றைய தோனி வரை அனேக கேப்டன்களின் ஆட்டத்திறமையை கண்டு மகிழ்ந்திருக்கிறேன்.

இளம் வயதிலேயே வெஸ்ட் இண்டிசின் புயல் வேக பந்து வீச்சை அச்சமின்றி எதிர் கொண்ட பட்டௌடி, இளம் வயதிலேயே கேப்டன் ஆனார். ஒரு அருமையான பேட்ஸ்மன். அவருடைய காலத்தில் டெஸ்ட் மேட்ச் மட்டுமே விளயாடப்பட்டு வந்தது. அதுவும் அப்பொழுதெல்லாம் கிரிக்கெட்டை ஜெண்ட்ல்மேன் விளையாட்டு என வர்ணித்து வெற்றித் தோல்விகளைப் பற்றி கவலைப் படாமல் விளையாடுவார்கள். அதனால் விளையாட்டில் பெரிய வியூகங்கள் வகுக்க வேண்டிய அவசியம் எல்லாம் அவர்களுக்கு இல்லை.அதனால் கேப்டனின் திறமையைப் பற்றி யாரும் அதிகமாக விவாதிப்பது இல்லை.

பட்டௌடிக்குப் பின் ஒரு சிலர் கேப்டனாக வந்தாலும் அஜித் வடெக்கர் கேப்டனாக இருந்த போதுதான் இந்திய அணி கொஞ்சம் கன்சிஸ்டன்சியாக விளையாட ஆரம்பித்தது. அவருக்குப் பின் சுனில் கவாஸ்கர் கேப்டன் ஆன பிறகுதான் இந்திய அணி ஒரு புத்துணர்வைப் பெற்றது. மிகுந்த திறமையான பேட்ஸ்மேனான கவாஸ்கரை அவுட்டாக்குவது என்பது அன்றைய டீம்களுக்கு மிகப் பெரிய சவாலாகவே இருந்தது. தொடக்க ஆட்டக்காரராக களம் இறங்கி இறுதிவரை ஆட்டம் இழக்கமால் ஆடக்கூடிய அற்புதமான பேட்ஸ்மேன் கவாஸ்கர். ஆனால் கேப்டனாக அவரது செயல் பாடுகள் பலத்த விமர்சனங்களுக்கு உள்ளானது. ஒருதலை பட்சமாக நடக்கிறார் என்று குற்றசாட்டு எழுந்தது. வெங்கட் ராகவன் போன்ற திறமையான வீரர்கள் இவரால் ஓரம் கட்டப்பட்டுவிட்டதாக கூறப்படுகிறது. இவர் கேப்டனாக இருந்தபோது அணியின் ஒற்றுமை குறைந்து போனது. ஒரு நாள் போட்டிகளில் தனிப்பட்ட முறையிலும் இவர் சரிவர ஆடவில்லை. அறுபது ஓவர் அவுட்டாகாமல் இருந்து வெறும் 36 ரன் எடுத்தது இவருடைய மிகப் பெரிய வீழ்ச்சியாகும்

தனிப்பட்ட முறையில் 10000 ரன் அடித்த முதல் இந்தியர் என்ற பெருமை மிகு பேட்ஸ்மேனாக இருந்த போதும் கேப்டனாக இவர் சரிவர செயல்படவில்லை என்பதுதான் உண்மை.. இதைப் போலவே பேடி, வெங்க் சர்க்கார் போன்றவர்கள் திறமையான பௌலர்களாகவும் பேட்ஸ்மேன்களாக இருந்தபோதும் கேப்டனகளாக ஜொலிக்கவில்லை . அதிரடி ஆட்டகாரர் கபில் தேவ் கேப்டனாக இருந்த போது எடுத்த பல தவறான முடிவுகளால் இந்திய அணி பல தோல்விகளை சந்தித்தது. எனினும் ஒரு நாள்1983 உலக கோப்பையை வென்றது அற்புதமான ஒரு நிகழ்வாகும். இதில் கபில் தேவ் பெரும் பங்கு ஆற்றியிருக்கிரார் என்பதும் மறக்க முடியாத உண்மையாகும்.

அஸாருதின் சூதாட்டப் புகாரில் சிக்கியவர் என்பதால் அவரது கேப்டன்சியை இங்கு விமர்சிப்பதே அர்த்தம்ற்றது. சச்சின் டெண்டுல்கர் அவருடைய பதட்டமடையாத் தன்மைக்காக பெரிதும் பாரட்டப்படுபவர். ஆனால் அவர் கேப்டனாக இருந்தபோது மிகுந்த பதட்டத்துடனேதான் காணப்படுவார். இந்த பதட்டமே அவருடைய கேப்டன்சியையும் அவருடைய பேட்டிங்கையயும் வெகுவாக பாதித்தது. அதன் காரணமாகவே கேப்டன்சி பொறுப்பிலிருந்து விலகிகொண்டுவிட்டார். டெண்டுல்கருக்குப் பிறகு கேப்டனான சவ்ரவ் கங்குலி இன்றைய இந்திய அணியின் வெற்றிகளுக்கெல்லாம். அஸ்திவாரமாக அமைந்தவர் என்றால் அது மிகை ஆகாது. வெற்றிப் பெற்றாக வேண்டும் என்ற முனைப்பை இந்திய அணிக்குள் புகுத்தியவர் கங்குலி. எதற்கும் விட்டு கொடுக்காமல் வெற்றி ஒன்றே குறிக்கோளாக விளையாடியவர் கங்குலி. பல வெற்றிகளையும் பெற்று தந்தார். ஆனால் வியூகங்களை வகுப்பதில் மிகுந்த திறமையுடன் செயல் பட்டார் என்று கூற முடியாது.

தோனி கேப்டன் ஆன பின்புதான் இந்திய டீம் ஒரு புதிய திசையையை நோக்கி பயணிக்க ஆரம்பித்தது.குழுவுக்குள் ஒற்றுமை, சிறப்பான விளையாட்டு வீயுகங்கள்,பந்து வீச்சாளர்களை சுழற்றும் முறை என அத்தனையயிலும் தனது தனி திறமையை காட்டினார் தோனி. டெஸ்ட், ஒரு நாள் மற்றும் 20-20 என்று அனைத்திலும் சாதனைகளை படைத்தார் தோனி. 20-20 உலக கோப்பையை வென்றார். டெஸ்ட் குழுக்களில் நம்பெர் ஒன் குழுவாக இந்தியாவை கொண்டு சென்றார். இதோ ஒரு நாள் போட்டிக்கான உலக கோப்பையினையும் வென்று காட்டியிருக்கிறார்.ஆடம்பரமில்லாதப் பேச்சு, எல்லோரையும் அரவணைத்து செல்லும் பாங்கு, இளைஞர்களுக்கு உரிய பங்கு அளித்தல், மூத்த வீரர்களுடன் இணக்கமான அணுகுமுறை என ஒரு கேப்டனுக்குரிய அனைத்திலும் மிக மிக சிறப்பாக செயல் படக்கூடிய கேப்டன் தோனி என்பது நிரூபிக்கப்பட்ட உண்மை.இந்திய கிரிக்கெட் வரலாற்றில் தோனிக்கு நிகரான கேப்டன்ங்கள் எவருமில்லை. அவருடைய கேப்டன்சி நீடிக்கவேண்டும்.இந்திய வெற்றிகள் மேன்மேலும் தொடர வேண்டும் .